Канон Священномученику Сергию Увицкому (Нижнетагильскому)

Тропа́рь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Сергие,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии// до сконча́ния ве́ка.

Кано́н , глас 4.

Песнь 1

Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Священномучениче Сергие, моли Бога о нас.

Во́ли Бо́жией послушли́в быв,/ свяще́нства дар прия́л еси́, священному́чениче Сергие,/ и, за Христа́ да́же до сме́рти пострада́в,/ ве́рный сын Це́ркве яви́лся еси́.

Священномучениче Сергие, моли Бога о нас.

Изгна́ние и разлуче́ние с па́ствою твое́ю му́жественне претерпе́л еси́, священному́чениче Сергие,/ но ничто́же возмо́же разлучи́ти тя от любве́ Бо́жия.

Священномучениче Сергие, моли Бога о нас.

Безбоя́зненно пропове́довал еси́ лю́дем покая́ние, священному́чениче Сергие,/ да обратя́т сердца́ своя́ к Бо́гу/ и то́кмо на Него́ в ско́рбех и лише́ниих упова́ние и́мут.

Пресвятая Богородице, спаси нас.

Ма́ти Бо́жия,/ дом Твой, Свята́я Русь, мо́лит Тя:/ изба́ви лю́ди Твоя́ от вся́кия ну́жды и ве́чнаго осужде́ния.

Песнь 3

Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Священномучениче Сергие, моли Бога о нас.

Егда́ прии́де испыта́ние ве́ры твоея́, священному́чениче Сергие,/ страда́ние за Христа́, я́ко благода́тный дар, прия́л еси́/ и кро́вию твое́ю Ру́сскую зе́млю обагри́л еси́.

Священномучениче Сергие, моли Бога о нас.

Егда́ прии́де гоне́ние от безбо́жных,/ столп непоколеби́м Ру́сския Це́ркве яви́лся еси́, священному́чениче Сергие,/ святы́х, я́ко бли́жних сро́дник, в по́мощь призыва́я,/ с ни́миже ку́пно ны́не прославля́ешися.

Священномучениче Сергие, моли Бога о нас.

А́ще и умерщвле́н был еси́ те́лом, священному́чениче Сергие,/ оба́че ду́хом ко́зни диа́вольския посрами́л еси́,/ име́я Христа́ прибе́жище и утвержде́ние.

Пресвятая Богородице, спаси нас.

Тя Предста́тельницу, Пречи́стая Де́во, мо́лим:/ преложи́ на́шу печа́ль на ра́дость и ско́рби належа́щия изба́ви, Засту́пнице на́ша.

Седа́лен, глас 3:

Заве́ты испове́дников и священному́чеников Христо́вых восприе́м,/ ду́шу твою́ за ве́ру Правосла́вную положи́л еси́, свя́те,/ е́юже утвержда́ется земля́ Ру́сская./ Сего́ ра́ди моли́ся, священному́чениче Сергие,/ любо́вию чту́щим тя ве́рным Христу́ до конца́ бы́ти.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Не и́мамы ина́го прибе́жища, ра́зве Тебе́, Богоро́дице,/ Оте́чества на́шего усе́рдная Засту́пнице:/ всяк бо, почита́яй Тя, наде́жду обрета́ет.

Песнь 4

Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Священномучениче Сергие, моли Бога о нас.

Да не дерза́ют язы́цы рещи́: где есть Бог ваш?/ Кровь бо новому́чеников от земли́ на́шея вопие́т:/ Го́споди, Госпо́дь наш, я́ко чу́дно и́мя Твое́ по всей Ру́сстей земли́.

Священномучениче Сергие, моли Бога о нас.

И́мже о́бразом жела́ет еле́нь на исто́чники водны́я,/ си́це ты, страстоте́рпче Сергие, к живоно́сным страда́нием за Христа́ прите́кл еси́,/ и́миже при́сно свяще́нно обновля́ется лице́ земли́ Ру́сския.

Священномучениче Сергие, моли Бога о нас.

Вся земна́я ни во что вмени́в Христа́ ра́ди,/ сло́вом и житие́м, священному́чениче Сергие ве́рных поуча́л еси́:/ о Бо́зе сотвори́м си́лу,/ и Той уничижи́т стужа́ющия нам.

Пресвятая Богородице, спаси  нас.

Стена́ необори́мая и Покро́в всемо́щный Росси́йским новому́чеником яви́лася еси́, Пресвята́я Де́во,/ те́мже Тя велича́ем.

Песнь 5

Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Священномучениче Сергие, моли Бога о нас.

Я́ко луч Со́лнца Пра́вды яви́лся еси́, священному́чениче Сергие,/ и страда́ньми твои́ми мглу безбо́жия над Оте́чеством на́шим разсе́ял еси́.

Священномучениче Сергие, моли Бога о нас.

Егда́ безбо́жнии тща́хуся сокры́ти тя в темни́це, священному́чениче Сергие,/ Госпо́дь яви́ тя испове́дника Своего́ всем конце́м земли́ Ру́сския.

Священномучениче Сергие, моли Бога о нас.

Ру́сския Це́ркве свети́льниче свяще́нный Сергие,/ кровьми́ му́ченическими неугаси́мо светя́й и у Престо́ла Бо́жия предстоя́й,/ моли́ся о чту́щих тя.

Пресвятая Богородице, спаси нас.

И́же от Де́вы неизрече́нно рожде́йся, Го́споди,/ сохрани́ моли́твами Ея́ Це́рковь Твою́,/ Тебе́ сла́вящую правосла́вными гла́сы.

Песнь 6

Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Священномучениче Сергие, моли Бога о нас

Восприи́м меч духо́вный, и́же есть глаго́л Бо́жий,/ безбо́жных ко́зни сокруши́л еси́, священному́чениче Сергие,/ и вся разжже́нныя стре́лы лука́ваго угаси́л еси́ щито́м ве́ры Правосла́вныя.

Священномучениче Сергие, моли Бога о нас

Во свяще́нницех благоче́стно пожи́в и муче́ния путь терпели́во восприи́м,/ сугу́бую мзду на Небесе́х обре́л еси́, священному́чениче Сергие,/ иде́же ева́нгельски при́сно ра́дуешися и весели́шися.

Священномучениче Сергие, моли Бога о нас

Ничто́же возмо́же разлучи́ти тя, богоприя́тне, от любве́ Христо́вы:/ ни скорбь, ни гоне́ние, ни смерть,/ вся бо сия́ си́лою Возлю́бльшаго тя Го́спода препобеди́л еси́, священному́чениче.

Пресвятая Богородице, спаси нас.

Пое́м Тя, Предста́тельнице те́плая и Засту́пнице христиа́н, Богоро́дице Всепе́тая,/ я́ко со все́ми святы́ми земли́ Ру́сския мо́лиши Сы́на Твоего́ и Бо́га на́шего/ обрести́ нам ве́лию ми́лость.

Конда́к, глас 2:

Восхва́лим, ве́рнии,/ изря́днаго во свяще́нницех/ и сла́внаго в му́ченицех Сергия,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га// спасти́ся душа́м на́шим.

И́кос:

Красу́йся и лику́й, Це́рковь Ру́сская,/ я́ко благопло́дная лоза́ свяще́ннаго страда́льца израсти́вшая,/ добропобе́дным муче́нием сердца́ ве́рных укрепи́вшаго,/ за́поведи Госпо́дни испо́лнившаго и при́сно ева́нгельски учи́вшаго:/ прииди́те, ча́да, послу́шайте мене́,/ не убо́йтеся от убива́ющих те́ло, души́ же не могу́щих уби́ти,/ убо́йтеся же па́че могу́щаго ду́шу и те́ло погуби́ти в гее́нне./ Те́мже, священному́чениче Сергие, моли́ Христа́ Бо́га спасти́ся душа́м на́шим.

Песнь 7

В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Священномучениче Сергие, моли Бога о нас

Я́ко трие́ о́троцы, в пещи́ вавило́нстей пла́менем объя́тии, моли́твою не сгара́ху,/ та́ко ты, священному́чениче Сергие, во огни́ муче́ний благода́тию ве́ру сохрани́л еси́./ Сего́ ра́ди ны́не с новому́ченики Росси́йскими лику́еши:/ благослове́н еси́, Бо́же отце́в земли́ на́шея.

Священномучениче Сергие, моли Бога о нас

Я́коже дре́вле о́троцы, в пещи́ неопаля́емии, злато́му истука́ну не поклони́шася,/ та́ко же и ты, священному́чениче Сергие, огне́м муче́ний неопаля́емь,/ безбо́жие небоя́зненно облича́л еси́, взыва́я с новому́ченики Росси́йскими:/ благослове́н еси́, Бо́же отце́в земли́ на́шея.

Священномучениче Сергие, моли Бога о нас

Же́ртву живу́ю и всесожже́ние Творцу́ себе́ сама́го принося́, священному́чениче Сергие,/ с новому́ченики Росси́йскими воспева́л еси́:/ могу́щии, покаря́йтеся, я́ко с на́ми Бог отце́в земли́ на́шея.

Пресвятая Богородице, спаси нас.

Я́же па́че ума́ и естества́ Бо́га ро́ждши, Неискусому́жная Мари́е,/ чту́щия Тя от враг ви́димых и неви́димых изба́ви,/ Ты бо еси́ земли́ отце́в на́ших Держа́ва необори́мая.

Песнь 8

Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Священномучениче Сергие, моли Бога о нас

Зе́млю Ру́сскую, безбо́жными гоне́нии неща́дно жего́мую,/ слеза́ми и кровьми́ твои́ми напои́л еси́, священному́чениче Сергие,/ сего́ ра́ди плоды́ ве́ры, ча́да церко́вная, возрасти́л еси́.

Священномучениче Сергие, моли Бога о нас

Зло́бы мучи́телей не убоя́лся еси́,/ огне́м любве́ Боже́ственныя ты́я препобеди́в,/ те́мже благода́ть моли́тися о нас стяжа́л еси́, священному́чениче Сергие, достохва́льне.

Священномучениче Сергие, моли Бога о нас

Благословля́я гони́телей твои́х, блаже́нне Сергие,/ усе́рдно моли́лся еси́ за них,/ да пока́ются и ку́пно с ве́рными бра́тиями благословя́т Го́спода.

Пресвятая Богородице, спаси нас.

Христа́ зря́щи умерщвля́ема, Многопе́тая Влады́чица,/ и ви́дящи исполне́ние Си́меонова прорече́ния, слезя́щи взыва́ше:/ благослове́н еси́, Бо́же, во ве́ки.

Песнь 9

Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Священномучениче Сергие, моли Бога о нас.

Рука́ми беззако́нных убие́н,/ же́ртва благоприя́тная и во́льное заколе́ние Бо́гу прине́слся еси́, свя́тче Бо́жий Сергие./ Тем благода́рне па́мять твою́ почита́ем.

Священномучениче Сергие, моли Бога о нас.

Госпо́дь, исполня́я смотре́ние Свое́ о Це́ркви Ру́сстей,/ засту́пника тя, священному́чениче Сергие, соде́ла./ Те́мже моли́ся Ему́, во благоче́стии нам пребыва́ти и спасти́ся душа́м на́шим.

Священномучениче Сергие, моли Бога о нас.

О бе́здна бла́гости Бо́жия!/ Дарова́ бо Бог возлю́бленным Свои́м ве́ры ра́ди пострада́ти/ и тя, священному́чениче Сергие,/ я́ко плод кра́сный спаси́тельнаго се́яния, избра́ от земли́ Ру́сския.

Пресвятая Богородице, спаси нас.

Разори́ сове́ты вся, на ны вооруже́нныя, Ма́ти Бо́га Вы́шняго,/ и ра́дости испо́лни упова́ющия на Тя,/ да усе́рдно вси Твое́ пропове́дуем заступле́ние.

Моли́тва

О избра́нниче и уго́дниче Христо́в, священному́чениче Сергие, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь. 

Велича́ние:

Велича́ем тя,/ священному́чениче Сергие,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.